ख्रिसमस डॉट कॉम

इंटरनेटच्या पसा-यात ख्रिसमससाठी एक स्वतंत्र जागा आहे. ख्रिसमसचा आनंद वाढवण्यासाठी इंटरनेटवरील काही संकेतस्थळांची माहिती आपण घेणार आहोत.ख्रिसमस निमित्ताने इंटरनेटवरील ख्रिसमसविषयी काही संकेतस्थळांची माहिती स्मार्ट क्लिकच्या वाचकांसाठी..

ख्रिसमसच्या दिवशी धम्माल करण्यासाठी एक भन्नाट संकेतस्थळ नेटवर उपलब्ध आहे आणि ते म्हणजे http:xmasfun.com. ख्रिसमससाठीचे संगीत, व्हिडिओ, रेसिपीज, गेम्स, कार्ड, विनोद, ग्राफिक्स अशा बऱ्याच गोष्टी तुम्हाला या संकेतस्थळावर बघायला मिळतील. लहान मुलांसाठी या संकेतस्थळावर स्वतंत्र विभागही आहे. या संकेतस्थळावरील डाऊनलोड विभागाला भेट देण्यास विसरू नका. यामुळे तुमचा आनंद आणखीनच द्विगुणित होईल.

www.northpole.com या संकेतस्थळावर तुम्हाला एक गाव दिसेल. त्यात अनेक घरं दिसतील. प्रत्येक घराची रचना वेगळी आहे. प्रत्येक घरात ख्रिसमससनिमित्त विशेष सजवलेल्या गोष्टी पाहायला मिळतील. उदा- सांता वर्कशॉपमध्ये सांताक्लॉज मुलांना विविध खेळणी कशी तयार करायची यांची माहिती देतोय. सांता डेनमध्ये तुम्हाला चित्रपट, संगीत, पुस्तके, सांताबरोबर प्रश्न-उत्तरे अशा गोष्टींचीही माहिती मिळेल. ख्रिसमसनिमित्त करावयच्या केकच्या रेसिपीजची माहितीही दिली आहे. याशिवाय टॉय शॉप, मेलरूम, क्लब हाऊस, इल्फ पल अ‍ॅकॅडमी अशा किती तरी गोष्टी यात आहेत. हा अनोखा अनुभव घेण्यासाठी या संकेतस्थळाला भेट द्यायलाच हवी.www.xmasdownloads.com हे असंच एक संकेतस्थळ. ख्रिसमस संदर्भातील स्क्रिनसेव्हर, डेक्सटॉप थीम, गेम्सशिवाय फेस्टिव गुडीज डाऊनलोड करण्यासाठी अनेक ठिकाणी शोध घेण्यापेक्षा या सगळ्या गोष्टी या एकाच संकेतस्थळावर मिळतील. या संकेतस्थळावर ख्रिसमस संदर्भातील इतर अनेक लिंकही दिल्या आहेत.

ख्रिसमसचा इतिहास

www.christmas-time.comप्रत्येक सण साजरा करण्यामागे इतिहासातील काही संदर्भ, परंपरा, कथा आणि रूढी असतात. ख्रिसमस सणाचा इतिहास व अन्य तपशील माहीत करून घेण्यासाठीचे हे संकेतस्थळ. या संकेतस्थळावर ख्रिसमसविषयीच्या इतिहासाबरोबर ख्रिसमस कार्ड, संगीत ऐकण्याची सोय आहे, तर ख्रिसमसच्या इतिहासाबरोबर जगातील अन्य देशांमध्ये ख्रिसमस कशा पद्धतीने साजरा होतो, सांतक्लॉजचा रंजक इतिहास अशी सगळी इंटरेस्टिंग माहिती www.thehistoryofchristmas.com या संकेतस्थळावर देण्यात आली आहे.

www.allthingschristmas.com नावाप्रमाणेच या संकेतस्थळावर ख्रिसमसविषयी सर्व माहिती देण्यात आली आहे. या संकेतस्थाळावरील ख्रिसमसकार्ड या विभागाला भेट देण्यास विसरू नका. कारण या संकेतस्थळावर मित्रांना पाठवण्यासाठी ख्रिसमसकार्ड तयार करण्याची नामी संधी मिळणार आहे.

ख्रिसमसविषयची अन्य संकेतस्थळे

www.christmas-day.org
www.xmasfonts.com
www.xmasbash.com
www.worldofchristmas.net
www.freechristmaswallpapers.net
www.the-north-pole.com
www.christmastree.org
www.whychristmas.com

सांताक्लॉजच्या भेटीसाठी

www.santaclaus.net
www.santas.net
www.santagames.net

नेट अपडेट- आता गुगलचा जी-फोन

आता गुगलचा जी-फोन

इंटरनेट वापरणा-या प्रत्येकाला गुगलच्या विविध सेवा वापरण्याची सवय झाली आहे. त्यामुळेच प्रत्येकाला गुगल नव्याने काय करणार आहे याची उत्सुकता असते. सध्या गुगलच्या एका नव्या उत्पादनाबद्दल नेट विश्वात जोरदार चर्चा सुरू आहे. ते उत्पादन म्हणजे ‘जी-फोन’. गुगल पुढील वर्षात स्वत:चा मोबाइल बाजारपेठेत आणणार आहे. विशेष म्हणजे या स्मार्ट मोबाइल फोनची विक्री थेट ग्राहकाला केली जाणार आहे. गुगल आणि तैवान येथील एचटीसी कॉपरेरेशन मिळून या मोबाइलची निर्मिती करणार आहे. एचटीसी कॉपरेरेशन स्मार्ट फोन उत्पादनांच्या जागतिक ब्रँडमध्ये चौथ्या क्रमांकावर आहे. या मोबाइलमधील सॉफ्टवेअर आणि डिझाइन गुगलचे असणार आहे. गुगलच्या या आगामी मोबाइल फोनचे बारसेसुद्धा झाले आहे. ‘नेक्सस वन’ या नावाने गुगल हा मोबाइल बाजारपेठेत आणणार आहे.

• सध्या नेक्सस वनची पहिली आवृत्ती गुगलच्या कर्मचा-यांसाठी उपलब्ध झाली आहे.
• वॉल स्ट्रीट जर्नलच्या वृत्तानुसार गुगल या मोबाइलची विक्री ऑनलाइन करणार आहे.
• इंटरनेटच्या विश्वात ज्याप्रमाणे गुगलने अन्य स्पर्धकांना मागे टाकले त्या पार्श्वभूमीवर हा जी-फोन काय कमाल करतो हे जाणून घेण्यासाठी थोडी वाट पाहावीच लागेल.

संकेतस्थळांची पोतडी

इंटरनेटचा पसारा एवढा मोठा आहे की त्यातील आपल्याला हवी ती गोष्ट शोधण्यासाठी बरेच क्लिक करावे लागतात. त्यातही जर आपल्याला माहीत नसलेल्या विषयातील माहिती किंवा संकेतस्थळ शोधायचे असेल तर गुगलसारखा जवळचा मित्र नाही. मात्र गुगलवर सर्च केल्यानंतर अनेक संकेतस्थळांची यादी आपल्यासमोर येते. यातील कोणत्या संकेतस्थळावर आपल्याला हव्या त्या विषयाची उत्तम माहिती आहे हे जाणून घेण्यासाठी पुन्हा बरीच शोधाशोध करावी लागते. यात बराच वेळ जातो. अशा वेळी गरज असते ती स्मार्ट क्लिक करण्याची..

तुम्हाला हवी ती तंतोतंत माहिती मिळवून देण्यासाठी www.categor.com हे संकेतस्थळ उपयोगी पडू शकते. आपण शोधत असलेल्या एखाद्या विषयातील उत्तम संकेतस्थळापर्यंत पोहोचण्यासाठी या संकेत स्थळावर स्मार्ट क्लिक करणे अधिक फायदेशीर ठरेल.

या संकेतस्थळावर Health, Counselling/Tips, Entertainment, Sports, Computers, Science/Knowledge, Other, News अशा आठ विषयांतील उत्तम संकेतस्थळांची यादी देण्यात आली आहे. त्यात अनेक उप-प्रकार आहेत. शिवाय प्रत्येक संकेतस्थळाच्या नावापुढे त्याची थोडक्यात माहितीही देण्यात आली आहे. त्यामुळे तुमचा सर्च अधिक सोपा होण्यास मदत होईल. त्याचबरोबर प्रत्येक संकेतस्थळला रेटिंग देण्यात आले आहे. त्यासाठी R या इंग्रजी अक्षराचा वापर केला आहे. ज्या संकेतस्थळा पुढे R ची संख्या जास्त ते संकेतस्थळ अधिक चांगले.

एखाद्या विषयासंदर्भात सर्व माहिती देणा-या संकेतस्थळापुढे All हा शब्द वापरण्यात आला आहे. या दोन्हीमुळे तुम्हाला हव्या त्या विषयासंदर्भातील उत्तम संकेतस्थळ शोधून काढणे सोपे होईल. या संकेतस्थळावर सध्या एक हजारहून अधिक संकेतस्थळांची माहिती ५७ विभागांमध्ये देण्यात आली आहे.

ही सर्व माहिती मिळवण्यासाठी तुम्हाला स्वत:चं लॉग इन करण्याची गरज नाही. categor.com वर देण्यात आलेली संकेतस्थळे ही युजर फ्रेंडली, उत्कृष्ट, मोठय़ा प्रमाणावर आणि मोफत माहिती मिळवून देणारी आहेत. त्यामुळे इंटरनेटच्या पसा-यात सर्च करताना हा क्लिक तुम्हाला नक्कीच उपयोगी ठरेल.

तुम्हाला हवी ती तंतोतंत माहिती मिळवून देण्यासाठी www.categor.com हे संकेतस्थळ उपयोगी पडू शकते. आपण शोधत असलेल्या एखाद्या विषयातील उत्तम संकेतस्थळापर्यंत पोहोचण्यासाठी या संकेत स्थळावर स्मार्ट क्लिक करणे अधिक फायदेशीर ठरेल.

कॉमिक डायजेस्ट मोबाईल फोनवर

कॉमिक डायजेस्ट मोबाईल फोनवर

लहान असताना मे महिन्याच्या सुट्टीत आणि अभ्यास करून कंटाळा आला की ज्या कॉमिक पुस्तकांनी आपलं मनोरंजन केलं त्या पुस्तकांच्या काही नेट आवृत्ती या पूर्वीच आल्या आहेत. पण आता ही कॉमिक पुस्तकंमोबाइल फोनवरही उपलब्ध झाली आहेत. ‘रेडिफ डॉट कॉम’ने चाचा चौधरी, बिल्लू, पिंकी, फॅन्टन शक्तिमान, पंचतंत्र, तेनाली रामा, विक्रम वेताळ, अकबर बिरबल, रामायण आणि महाभारत इत्यादी सदाबहार कॉमिक डायजेस्ट मोबाइल फोनवर उपलब्ध करून दिली आहेत. यासाठी तुमच्या जीपीआरएस सुविधा असलेल्या मोबाइल हॅन्डसेटवरून http://mobile.rediff.com/comic वर लॉग ऑन करावं लागेल.

पेंटिंगच्या दुनियेत..

कोणत्या आर्ट गॅलरीत कोणत्या चित्रकाराच्या चित्रांचं प्रदर्शन भरलं आहे याची माहिती संबंधित आर्ट गॅलरीच्या संकेतस्थळावर मिळतेच. जगभरातील सर्व आर्ट गॅलरीजच्या संकेतस्थळांवर असं वेळापत्रक उपलब्ध असतं. पण ही सर्व माहिती मिळवण्यासाठी प्रत्येक वेळी स्वतंत्र संकेतस्थळावर क्लिक करावा लागतो. इंटरनेटच्या पसा-यात सर्व आर्ट गॅलरीजची माहिती एकाच ठिकाणी मिळाली तर पेंटिंगच्या दुनियेत रमणा-यांसाठी तो एक स्मार्ट क्लिक ठरेल.

प्रत्येक क्षेत्रातील अभिजात गोष्टींपासून आपण सर्व जण अनेक कारणांनी दूर राहतो. इंटरनेटवर पेंटिंगच्या दुनियेची माहिती देणारी अनेक संकेतस्थळं आहे. अनेक चित्रकारांची स्वत:ची संकेत स्थळंही आहेत. त्या संकेत स्थळांवर त्यांच्या चित्रकलेचे नमुने तसेच त्यांच्या चित्रकलेचे प्रदर्शन कोठे आहे. याची माहिती मिळते. देशातील नव्हे तर जगातील आर्ट गॅलरीजच्या संकेत स्थळावर त्या गॅलरीची माहिती बरोबरच तेथे कोणत्या कालावधीत कोणते प्रदर्शन भरणार आहे यांची माहिती मिळते. कोणत्या आर्ट गॅलरीत कोणत्या चित्रकाराच्या चित्रांचं प्रदर्शन भरलं आहे किंवा भरणार आहे याची माहिती संबंधित आर्ट गॅलरीच्या संकेतस्थळावर मिळतेच. जगभरातील सर्व आर्ट गॅलरीजच्या संकेतस्थळांवर असं वेळापत्रक उपलब्ध असतं. पण ही सर्व माहिती मिळवण्यासाठी प्रत्येक वेळी स्वतंत्र संकेत स्थळावर क्लिक करावा लागतो. इंटरनेटच्या पसा-यात सर्व आर्ट गॅलरीजची माहिती एकाच ठिकाणी मिळाली तर पेंटिंगच्या दुनियेत रमणा-यांसाठी तो एक स्मार्ट क्लिक ठरेल.

http://paintingdb.com या संकेत स्थळावर जगातील अनेक देशांतील आर्ट गॅलरीजची माहिती मिळते. ही माहिती केवळ नाव देण्यपुरतीच मर्यादित नसून त्यात आर्ट गॅलरीचा पूर्ण पत्ता, सोबत गुगल मॅपवर या संबधित गॅलरीचं नेमकं ठिकाण दाखवणारा नकाशा, त्याचबरोबर या गॅलरीमध्ये कोणती पेंटिंग्ज आहेत हे देखिल पाहण्याची सोय या संकेत स्थळावर आहे. जगातील एकूण ३१ देशातील आर्ट गॅलरीजची माहिती या संकेतस्थळावर आहे. त्याच बरोबर artists या विभागात ६५१ चित्रकारांची माहिती आणि त्यांची काही पेंटिंग्ज आपण पाहू शकतो. सध्या या संकेतस्थळावर भारतातील आर्ट गॅलरीज आणि भारतीय चित्रकार यांची माहिती उपलब्ध नसली तरी अधिकाधिक देशांतील पेंटिंग्जची माहिती देण्याचा प्रयत्न या संकेतस्थळाच्या निर्मात्याकडून केला जात आहे.

centuries of art विभागात १४व्या शतकापासून ते २० व्या शतकापर्यंत प्रत्येक देशातील पेंटिंग्ज पाहता येतील. संकेत स्थळावरील पेंटिंग्ज पाहून कंटाळा आलाच तर Art quiz आणि Art puzzle विभाग आहेच. Art puzzle मध्ये तुम्ही एखादे पेंटिंग puzzle स्वरूपात करून घेऊ शकता. पेंटिंगची आपल्याला आवड असो वा नसो मात्र इंटरनेटचा वापर करताना अधून मधून असा स्मार्ट क्लिक करण्यास हरकत नाही.

डेस्कटॉप गुगल

गुगल सर्च, जी-मेल, ऑर्कुट अशा काही सेवांव्यतिरिक्त इंटनेटचा वापर अधिक ‘युजर फ्रेन्डली’ व्हावा यासाठी गुगल आपल्या लॅबमधून प्रयत्न करत असते. आपल्या नजरेतून सुटणाऱ्या गुगलच्या अशा काही अपडेटपैकीच Google Desktopची माहिती आपण आज घेणार आहोत.

इंटरनेटचा वापर करणा-यांमध्ये सर्वाधिक लोकप्रिय शब्द कोणता, असं विचारल्यास ‘गुगल’ हेच उत्तर ऐकायला मिळेल. गुगलच्या या लोकप्रियतेमुळेच ऑक्सफर्डनेही आपल्या शब्दकोशात गुगल या शब्दाचा समावेश केला आहे. गुगलच्या अनेक सेवांचा वापर करणारे आपण सारे गुगिलियन्स आहेत. या अनेक सुविधांपैकी सर्व आपण वापरतोच असं नाही. गुगल सर्च, जी-मेल, ऑर्कुट अशा काही सेवांव्यतिरिक्त इंटनेट वापर अधिक युजर फ्रेंडली होण्यासाठी गुगल आपल्या लॅबमधून प्रयत्न करत असते.

मागील लेखात काही हटके वॉलपेपर असणा-या संकेतस्थळांची माहिती आपण घेतली. अशाच प्रकारची एक सेवा गुगलकडून दिली जाते ती म्हणजे Google Desktop!आपल्या अनेक प्रश्नाची उत्तरं गुगलकडून मिळतात. एखादी गोष्ट शोधण्यासाठी किंवा जी-मेल, ऑर्कुट वापरण्यासाठी दर वेळी आपल्याला नवी विंडो ओपन करावी लागते. पण जर गुगलच्या सर्व सेवा तुमच्या Desktop वर एका क्लिकवर मिळाल्या तर तो तुमच्यासाठी नक्कीच स्मार्ट क्लिक ठरेल. Google Desktop मध्ये नेमकी हीच सोय उपलब्ध आहे. यासाठीची फाइल तुम्हाला संगणकावर डाऊनलोड करावी लागेल. ही फाइल रन केल्यावर संगणकाच्या screen च्या उजव्या हाताला एक नवी विंडो ओपन झालेली दिसेल. ही विंडो म्हणजे Google Desktop होय. या विंडोच्या सर्वात वर बाजूला Add gadgets, menu, minimize हे तीन पर्याय दिसतील. त्याच्या खाली या Desktop वर काही लहान विंडो दिसतील. (उदा. घडय़ाळ, तुमचा आवडता स्क्रिन सेव्हर, हवामानाची माहिती देणारी विंडो इ.) वर सांगितल्याप्रमाणे गुगल देत असलेल्या सर्व सेवा तुम्ही या Desktop वरून वापरू शकता. गुगलच्या या Desktop वर कोणत्या सुविधा आहेत आणि त्यापैकी तुम्हाला कोणत्या सेवा वापरायच्या आहेत, हा निर्णय तुम्ही घेऊ शकता. तुम्हाला नको असल्यास यातील एखादी विंडो तुम्ही काढून टाकू शकता. त्याचबरोबर एखादी नवी गोष्टAdd करू शकता. गुगल देत असलेल्या सेवा Add करण्यासाठी तुम्हाला Add gadgets मध्ये जावे लागेल. या ठिकाणी New, Recommendations, Google Created, Recently Used, Updates, News, Sports, Lifestyle, Finance,Tools, Fune & Games, Technology, Communication हे पर्याय दिसतील. यातील तुम्हाला Desktop वर पाहिजे असलेल्या अपडेटच्या अ Add बटणावर क्लिक केल्यानंतर ती विंडो Google Desktop वर येईल. Add gadgets मध्ये गेल्यावर गुगल म्हणजे अलिबाबाची गुहा वाटावी इतक्या प्रकारच्या सेवा नजरेस पडतील. उपयुक्त विंडोजपैकी एक म्हणजे ताज्या बातम्या देणारी विंडो. यामध्ये जगातील बातम्या देणा-या ३१२ संकेतस्थळांच्या विंडो गुगलने उपलब्ध करून दिल्या आहेत. Add gadgets मधून अनेक प्रकारच्या गेम विंडोजही घेता येतात. जी-टॉक, ऑर्कुट, जी-मेल या विंडोही येथे उघडता येतात.

हा Desktopसंगणकाच्या screen च्या उजव्या किंवा डाव्या बाजूला ठेवता येतो. तसंच संगणकावर दुसरं कोणतंही काम करत असतानाही याचा वापर करता येतो. एखादं काम करताना हा डेस्कटॉप नको असेल तर तो काढताही येतो. तसंच त्याचे क्रमही निश्चित करता येतात. गुगलचा हा Desktop मिळवण्यासाठी http://desktop.google.comवर स्मार्ट क्लिक करायलाच हवा.

हटके वॉलपेपर..

संगणक आणि इंटरनेटचा वापर आता केवळ शहरांपुरता मर्यादित राहिलेला नाही. शहराबरोबरच खेडेगावातही संगणक आणि इंटरनेटचा वापर मोठ्या प्रमाणात होत आहे. अनेक इंटरनेट कॅफेमधून इंटरनेटवर काम करताना दिसणारी शहर आणि गावातील मंडळी तासनतास computer वर काय करत असतात, असा प्रश्न अनेक वेळा आपल्याला पडतो. आपणही त्यापैकीच एक आहोत. Computer वर मेल चेक करणे किंवा आपल्या संगणकाच्या dsktop साठी इतरांपेक्षा वेगळे, जरा हटके असे wallpaper सर्च करणे, हा कित्येकांचा एक छंदच आहे. इंटरनेटचा अधिकाधिक उपयोग आपण wallpaper च्या शोधासाठीच करत असल्याची माहिती एका online संशोधनातूनच नुकतीच पुढे आली आहे.

तुमच्या संगणकाच्या desktop वर कोणकोणते wallpaper आहेत, याकडे अनेकांचं स्वाभाविकपणे लक्ष जातं. त्यामुळेच आपण आपल्या desktop वरचा wallpaper इतरांपेक्षा वेगळा ठेवण्याचा सतत प्रयत्न करत असतो. तुमच्या संगणकाच्या desktop वर हॉलिवूड आणि बॉलिवूडमधील अनेक अभिनेते आणि अभिनेत्रींनी आतापर्यंत वर्णी लावली असेल. पण ही अतिशय कॉमन गोष्ट झाली आहे. काही वेळा आपण जे फोटो wallpaper म्हणून download करतो, त्यावर अनेकदा copy right चा शिक्का असतो. पण जर तुम्हाला काही वेगळे wallpaper हवे असतील तर http://simpledesktop.com या संकेतस्थळावर स्मार्ट क्लिक करा. इंटरनेटच्या मोठय़ा पसाऱ्यात तुमच्या desktop वर काही वेगळे wallpaper मिळवण्यासाठी या संकेतस्थळासारखा उत्तम मार्ग तुमच्याकडे आहे.

या संकेतस्थळावर wallpaper चे काही नमुने तयार करून दाखवले आहेत. हे wallpaper तुम्ही मोफत save करू शकता. यासाठी कोणत्याही प्रकारची log in करण्याची गरज भासत नाही. वेगवेगळे wallpaper लावून संगणकाचा desktop इतरांपेक्षा वेगळा ठेवण्यासाठी हा क्लिक तुम्हाला निश्चितच उपयोगी पडेल. इतकंच नव्हे; तर या संकेतस्थळावर तुम्ही स्वत:ही wallpaper तयार करू शकता. तुम्ही पाठवलेले wallpaper तुमच्या नावाने या संकेतस्थळावर दिसतील. त्यासाठीच्या काही सूचना या संकेतस्थळावर दिल्या आहेत. त्यामुळे तुम्ही हे सहज करू शकता.

फोटोस्टुडिओ घरच्या घरी

स्वत:चे फोटो एडिट करायचे असतील, त्यांना स्पेशल इफेक्ट द्यायचे असतील तर आता फोटो स्टुडिओचा रस्ता धरण्याचं कारण नाही. कारण ही सोय आता काही संकेतस्थळांवर उपलब्ध आहे.

सुखद आठवणींचे क्षण फोटोच्या माध्यमातून कायम जपता येतात. त्यामुळे फोटो हा सर्वाच्याच जिव्हाळ्याचा विषय असतो. त्यामुळे आपले फोटो एडिट करण्यासाठी आणखी एका भन्नाट संकेतस्थळाबद्दल माहिती घेऊ या. मागच्या भागात आपण ‘बी फंकी’ या संकेतस्थळाच्या माध्यमातून फोटोवर सहज करता येतील अशा काही इफेक्ट्सबद्दल माहिती करून घेतली होती.

आपल्या घरातील फोटो मग ते एखाद्या समारंभाचे असो की सर्व कुटुंबीयांनी एकत्र येऊन साज-या केलेल्या एखाद्या सणाचे किंवा मग कॉलेजमधील मित्रांसोबत केलेली धम्माल. अशा फोटोवर काही एडिटिंग करायचं झाल्यास आपण सरळ एखाद्या महागड्या फोटो स्टुडिओची वाट धरतो आणि तो सांगेल ते पैसे मोजून मोकळे होतो.

पण यावर उपाय आहे तो म्हणजे LoonaPix.com या संकेतस्थळावर स्मार्ट क्लिक करण्याचा. हे संकेतस्थळ तुम्हाला फोटो एडिटिंगची सेवा देतं. विशेष म्हणजे यासाठी तुम्हाला काहीच पैसे मोजावे लागत नाहीत. संगणक वापरण्याच्या किमान कौशल्यांद्वारे तुम्ही तुमच्या फोटोना कुल लुक देऊ शकता.

या संकेतस्थळावर मुख्य चार प्रकारे फोटो एडिट करता येतात.

पहिला प्रकार म्हणजे LoonaPic Effect यामध्ये एकूण ८३ प्रकारे तुम्ही फोटो एडिट करू शकता. चित्रपटातील स्टार्सप्रमाणे आपणही कुठेना कुठे झळकावं अशी प्रत्येकाची इच्छा असते. शहरातील किंवा शॉपिंग मॉलमधील मोठमोठ्या होर्डिग्सवर अनेक हॉलिवुड आणि बॉलिवुड अभिनेत्री आणि अभिनेत्याचे फोटो आपण पाहत असतो. प्रत्यक्षात अशा होर्डिग्सवर आपले फोटो येणार नाही हे माहीत असतं. तरीही आपण त्या होर्डिगवर कसे दिसू हा विचार मनोमनी येऊन जातोच. प्रत्यक्षात हे शक्य नसलं तरी या संकेतस्थळाच्या माध्यमातून तरी आपण आपल्याकडील फोटोंवर काम करून ही कल्पना आपल्यापुरती का होईना प्रत्यक्षात आणू शकतो. वर सांगितल्याप्रमाणे ८३ प्रकारे तुम्ही तुमचा फोटो वेगवेगळ्या होर्डिग्सवर झळकवू शकता.

Face Effect यामध्ये तुम्ही चित्रपटातील अभिनेता अथवा अभिनेत्रीच्या जागी स्वत:चे फोटो लावू शकता. ‘लगे रहो मुन्नाभाई’ चित्रपटातील लकी सिंग तुम्हाला नक्की आठवत असेल. तो ज्या प्रमाणे जगातील अनेक प्रसिद्ध व्यक्तीसोबत फोटो काढतो त्या प्रमाणे तुम्ही या संकेतस्थळावर हॉलिवुड अभिनेता आणि अभिनेत्री, टेनिसपटू, फुटबॉल खेळाडू यांच्यासोबत स्वत:चे फोटो तयार करू शकता किंवा त्यांच्या फोटोच्या जागी स्वत:चा फोटो लावू शकता.

Photo Frames यामध्ये तुम्ही तुमच्याकडील फोटोजना त्यातील प्रसंगानुसार इफेक्ट देऊ शकता. यामध्ये वाढदिवसासाठीचे, मैत्रीसाठीचे अशा अनेक खास फ्रेम आहेत. एकूण २७३ फोटो फ्रेममधून तुम्ही तुमच्या फोटोसाठी योग्य ती फ्रेम निवडू शकता.

Photo Trim या मध्ये तुम्ही तुमचे फोटो विविध प्रकार आणि आकारात बसवू शकता. या विभागात दिलेल्या ३३ प्रकारच्या आकारांमध्ये तुम्ही फोटो बसवू शकता. या संकेतस्थळावर लॉग इन करण्याची आवश्यकता नसते. तुम्ही तुमच्या फोटोंना दिलेल्या इफेक्टनंतर या संकेतस्थळावरील गॅलरीमध्ये सेव्ह करू शकता. हे सेव्ह केलेले फोटो इतर जणही वापरू शकतात. त्यामुळे फोटो सेव्ह करताना मात्र योग्य ती काळजी घेणं महत्त्वाचं आहे. तुमच्या MySpace, Facebook, Orkut, Hi5 आदी प्रोफाइलच्या फोटोजना कुल लुक देण्यासाठी या संकेतस्थळाचा नक्कीच उपयोग होऊ शकतो. ज्यांना ‘फर्स्ट इंप्रेशन इज द लास्ट इंप्रेशन’चं महत्त्व कळतं ते असा स्मार्ट क्लिक करण्यास उशीर करत नाहीत. या संकेतस्थळाला भेट दिल्यानंतर तुम्ही फोटो एडिटिंग आणि स्पेशल इफेक्टिंगसाठी फोटो स्टुडिओचा रस्ता विसरल्यास आश्चर्य वाटण्याचं कारण नाही.

इतिहासाचा लेखाजोखा

इतिहासात डोकावण्याची सवय जशी अभ्यासकांना असते, तशी ती सामान्य व्यक्तींनाही असते. या डोकावण्याच्या हेतूंमध्ये मात्र फरक असतो. अभ्यासक इतिहासाच्या घटनांवर प्रकाश टाकण्यासाठी, घटनांचा नवा अर्थ शोधण्यासाठी तर सामान्य व्यक्ती केवळ उत्सुकतेपोटी किंवा इतिहासातील भव्य गोष्टींविषयी असलेल्या आकर्षणापोटी इतिहासात डोकावतात.

असं असलं तरी इतिहासाच्या आवडीने त्या वाटेला जाणा-यांची संख्या कमीच असते. कारण असतं, इतिहासातील गुंतागुंत, सणावळ्या. पण हाच इतिहास जर साध्या आणि सोप्या पद्धतीने करून सांगितला तर इतिहासापासून पळणारे त्याच्या जवळ येतील. इतिहासात डोकावण्याची, तो माहीत करून घेण्यासाठीचं एक हटके संकेतस्थळ म्हणजे Maps-of-War.com

जगाचा इतिहास युद्धावरच आधारित आहे, असं म्हटलं जातं. या युद्धांतून काय साध्य झालंय, हा वादाचा प्रश्न असला तरीही युद्धामुळे झालेल्या बदलांचा परिणाम अनेक पिढय़ांवर झाले आहेत, हे सत्य नाकारता येत नाही. युद्धाविषयी वृत्तपत्रं आणि टीव्हीच्या माध्यमातून ज्या काही बातम्या कळतात, त्यातून युद्धाबद्दल सर्व माहिती मिळतेच असं नाही. नेमका हाच उद्देश ठेऊन निर्मात्याने हे संकेतस्थळ तयार केलं आहे.या संकेतस्थळाच्या नकाशे ((Maps) या विभागात मुख्य सात नकाशे दिले आहेत. यातील पहिल्या नकाशात (March-of-Democracy) जगातील लोकशाहीचा प्रवास कसा झाला याची माहिती दिली आहे. चार हजार वर्षातील लोकशाहीचा प्रवास ९० सेकंदांमध्ये दाखवला गेला आहे.

History-of-Religion मध्ये पाच हजार वर्षात जगातील कोणत्या देशात कोणता धर्म वाढला याची माहिती दिली आहे. जगातील विविध धर्मात हिंदू, ज्यू, ख्रिश्चन, इस्लाम, बैद्ध हे धर्म कसे वाढत गेले याची माहिती यातून मिळते.जगावर नजर ठेवून असणा-या अमेरिकेने आपलं वर्चस्व राखण्यासाठी अनेक देशांवर युद्ध लादलं किंवा युद्धासाठी आर्थिक मदत केली. या देशाच्या २३१ वर्षाच्या इतिहासात कोणत्या अध्यक्षाने व पक्षाने आपल्या कार्यकाळात किती देशांत युद्ध केलं, त्या युद्धात किती जण ठार झाले, हा इतिहास समजून घेणं बदलत्या जागतिक परिस्थितीत गरजेचं ठरतं. अमेरिकेचे पहिले अध्यक्ष जॉर्ज वॉशिंग्टन ते सध्याचे अध्यक्ष बराक ओबामा यांच्यापर्यंतच्या अध्यक्षांच्या कार्यकाळातील युद्धाची माहिती घेण्यासाठी Leadership-and-War यावर क्लिक करायलाच पाहिजे.मध्यपूर्व आशिया हा भूभाग जागतिक राजकारणाच्या दृष्टीने कायम महत्त्वाचा ठरला आहे. या भूभागावर कोणी, किती काळ राज्य केलं, बदलत्या राजकीय परिस्थीतीत या प्रदेशावर नव्या देशांचा झालेला जन्म इत्यादी माहिती Imperial-History यामध्ये मिळते. विशेष म्हणजे या संकेतस्थळावरील सर्व नकाशे हे नेहमीच्या स्थिर पद्धतीने न देता ते मल्टीमीडियाच्या स्वरूपात दिले आहेत. त्यामुळे इतिहासात डोकावणं जास्त गुंतागुतीचं होत नाही.

संकेतस्थळावरील LIBRARY या विभागात युद्धविषयक जगातील काही महत्त्वाच्या संकेतस्थळांच्या लिंकही देण्यात आल्या आहेत. ज्यामध्ये पहिल्या महायुद्धाच्या पूर्वीपासून सध्या अमेरिकेने सुरू केलेल्या अफगाण आणि इराकमधील बगदाद युद्धाची माहिती मिळते. या संकेतस्थळावरील नकाशे डाऊनलोड करण्याची सोय आहे. त्याचबरोबर हे नकाशे व्यावसायिक, शैक्षणिक कारणासाठी वापरता येतात. त्यासाठी फक्त औपचारिक परवानगी घेणं आवश्यक असतं. याशिवाय तुमच्याकडील युद्धाविषयीची माहितीही तुम्ही पाठवू शकता. येथील माहिती वापरताना फक्त संदर्भ म्हणून त्याचा उल्लेख करावा इतकीच अपेक्षा याच्या निर्मात्यांची आहे. आणखी महत्त्वाची गोष्ट म्हणजे Maps-of-War वरील नकाशे तुम्ही तुमच्या स्वत:च्या संकेतस्थळावर अथवा /blog वरही आणू शकता. त्यासाठी करायची पद्धतीची माहिती इथे दिली आहे. Maps-of-war ने जगातील युद्धांची माहिती देणाऱ्या मल्टीमीडिया नकाशे असणा-या संकेतस्थळाची यादी दिली आहे. अधिक माहितीसाठी त्यावर क्लिक करण्यास हरकत नाही. Maps-of-warवरील सर्व नकाशे संशोधनपूर्ण आहेत. त्यामुळे हा इतिहास माहीत करून घेताना जगाच्या अभ्यासाला सुरुवात होते.

बी फंकी..

आज मल्टीमीडियाच्या जमान्यात ऑर्कुट, फेसबुक अशा सोशल नेटवर्किंग साइट्स हाताळणं अगदीच कॉमन झालंय. फस्ट इंप्रेशन इज लास्ट इंप्रेशन हे ज्यांना कळतं ते स्मार्ट क्लिक करतातच. या नेटवर्कवरील स्वत:च्या प्रोफाइलसाठी प्रत्येकालाच सर्वाहून अतिशय वेगळा फोटो हवा असतो. अगदी आपला स्वत:चा फोटो वापरायचा झाला तरी तोही सॉलिड असावा, अशी इच्छा असते. कारण तुमच्या प्रोफाइलला भेट देणारी व्यक्ती प्रोफाइलवर पहिल्यांदा फोटोच बघते. अर्थात, आपणही बरेचदा फोटो पाहूनच इतरांच्या प्रोफाइलमध्ये डोकावत असतो. फोटो, मग तो आपल्या बालपणाचा असो की तरुणपणीचा, अथवा अनेकांना फॉर्वड होत, होत आपल्या मेल बॉक्समध्ये आलेला आपण तो आवर्जून पाहतो.

यातल्या आपल्या फोटोंवर काही तरी करामती कराव्यात, अशा इच्छा आपल्याला अनेकदा होतात. फोटोशॉपसारख्या सॉफ्टवेअरच्या माध्यमातून हे शक्य असतं. पण कधी हे सॉफ्टवेअर उपलब्ध नसतं तर कधी आपले प्रयत्न कमी पडतात. ते सॉफ्टवेअर कसं वापरावं, याचं ज्ञान आपल्याला असेलच असंही काही कारण नसतं. पण तरीही आपल्या स्वत:च्या फोटोंना थोडा हटके आणि फंकी लूक द्यायचा असेल तर आपल्याला बी फंकीवर स्मार्ट क्लिक करावा लागेल.

या संबंधांतील कोणत्याही सॉफ्टवेअरचं ज्ञान नसताना फोटोवर भन्नाट इफेक्ट्स करण्याची सोय बी फंकी या साइटवर आहे. मुख्य पाच प्रकारांत (त्यातही अनेक उपप्रकार आहेत) आणि इतर २१ प्रकारे तुम्ही तुमच्या फोटोंना इफेक्ट्स देऊ शकता. यासाठी पैसे मोजण्याची गरज नाही. अर्थात, बी फंकीने नव्याने सुरू केलेल्या ‘बी फंकी प्लस’ या सेवेसाठी मात्र पैसे मोजावे लागतात. पण आपल्याला खर्च करायची आवश्यकता नाही. कारण या साइटवर पैसे न मोजताही अनेक इफेक्ट्स उपलब्ध आहेत.

विशेष म्हणजे बी फंकीवर तुम्ही स्वत:चं account ओपन करू शकता. तुम्ही ज्या फोटवर विविध इफेक्ट्स केले आहेत, ते तुमच्या प्रोफाइलमध्ये सेव्ह करू शकता आणि तुमच्या मित्रांनाही पाठवू शकता.

फोटोवर केलेले इफेक्ट्स t-shirt, postage, mug, card, postcard, keychain, sticker, magnet यावर प्रिंट करून घेऊ शकता. फक्त त्यासाठी थोडे पैसे मोजण्याची तयारी हवी. अर्थात, हे इफेक्ट्स इतके भन्नाट आहेत की, या पद्धतीने स्वत:चे फोटो आपल्या आवडत्या वस्तूवर प्रिंट करून घेताना थोडे पैसे खर्च करणं तुम्हाला फारसं अवघड वाटणार नाही.

या साइटवरीली explorer विभागात बी फंकीच्या निर्मात्यांनी काही विशेष इफेक्ट्स वापरलेले फोटो आहेत. ते तुम्ही तुमच्या प्रोफाइलसाठी वापरू शकता. या विभागातील फोटो तुम्ही तुमच्या account मध्ये सेव्हही करू शकता.

We’re changing the face of the internet. And the faces of those who surf it.

बी फंकीच्या सहा तरुण निर्मात्यांनी या शब्दांत आपली ओळख करून दिली आहे. या ब्रिदवाक्याचा पुरेपूर अनुभव ही साइट वापरताना होतो. तेव्हा तुमचं फस्ट इंप्रेशन फंकी असावं, असं वाटत असेल तर स्मार्ट क्लिक करा, http://www.befunky.com/

टास्क बार तुमच्या नावावर

संगणकामध्ये एखाद्या फाइलला किंवा फोल्डरला आपल्याला हवं ते नाव देता येतं. मात्र जर तुमच्या संगणकाच्या टास्कबारवर आपल्या आवडीनुसार एखादं नाव लिहायचं असेल तर? अशक्य वाटतंय ना? पण हे अगदी सहज शक्य आहे. विंडोच्या टास्कबारवर तुम्ही हवं ते नाव लिहू शकता. यासाठी कोणत्याही सॉफ्टवेअरची गरज नाही फक्त एक ट्रिक करावी लागेल.

Start>>settings>>Control Panel

या क्रमाने जा. Control Panel ¸f²¹fZ Regional and Language Options या फाइलवर क्लिक करा. ही फाईल ओपन होताच तिथे तुम्हाला Regional Options, Languages, Advanced हे तीन पर्याय दिसतील. त्यातील Customize या पर्यायावर क्लिक करा. त्यानंतर Customize Regional Options ही वेगळी विंडो ओपन होईल. या विंडोमध्ये Number, Currency, Time आणि Date हे पर्याय दिसतील. त्यातील Time क्लिक करा. Time विंडोमध्ये AM symbol आणि PM symbol हे पर्याय दिसतील. या पर्यायासमोर हे AM, PM आधीचे पर्याय असतील. तेथे क्लिक करून तुम्ही तुमचे नाव अथवा तुम्हाला हवा तो मजकूर लिहू शकता. मात्र एक गोष्ट लक्षात ठेवा, या ठिकाणी बारा शब्दांपेक्षा अधिक शब्दांचा वापर करता येणार नाही. हवं ते नाव लिहिल्यानंतर केलेले बदल Save करण्यास विसरू नका.

इंटरेस्टिंग चॅट विंडो

इंटरनेटबरोबर गुगल हे समीकरण कधी अस्तित्वात आले आणि कधी ते सर्वमान्य झाले याचा शोध न घेतलेला बरा. गुगल आणि त्यांच्या इतर सेवा इतक्या लोकप्रिय झाल्या आहेत की जगातील इंटरनेट वापरणारा प्रत्येक जण हा गुगलीयन झाला आहे. काही माहिती हवी असेल तर गुगल सर्च, दुस-या कोणत्या तरी ई-मेलची सेवा देणा-या कंपनीचा ई-मेल आयडी असतानाही तुमच्यापैकी अनेकांनी जी-मेलचा ई-मेल आयडी ओपन केला. गुगल इमेज, न्यूज, मॅप, ग्रूप, ब्लॉगर अशा अनेक सेवा गुगल देते.(गुगलच्या काही गुपिताविषयी नंतर कधी तरी) गुगलच्या या सर्व सेवांचा वापर करणारे आम्ही-तुम्ही गुगिलीयन्स आहोत. हे सदर सुरू करताना सुरु वात कोठून करावी, असा प्रश्न होता. (याचे उत्तर मात्र गुगलने शोधून दिले नाही) सध्या गुगलच्या काही सेवांमध्ये जी-टॉकचा वापर आपण सर्व जण करतो. कारण ऑनलाइन राहणे हा तर आपला धर्मच! म्हणूनच जी-टॅकवर चॅट करताना जी टॉकमध्ये आपण चॅट करत असतो तेव्हा जी चॅट विंडो ओपन होते तिची background पांढरी असते. जर त्या background च्या ठिकाणी आपल्याला हवा तो फोटो टाकता आला तर..

जी मेल वापरताना गुगलने दिलेल्या काही background आपण मेल आयडीसाठी वापरतो त्याप्रमाणेच जी-टॉकसाठीही background वापरता येते. महत्त्वाचं म्हणजे आपल्याला हवा तो फोटो background साठी निवडता येतो. तोही फुकटात. यासाठी तुम्हाला My Theme हा प्रोगॅम डाऊनलोड करून घ्यावा लागेल. यासाठी खालील लिंकवर क्लिक करा.. http://www.mediafire.com/download.php?2jyeztmivzw

हे वेब पेज ओपन होताच You requested : My Theme.exe(936.62 KB) ही फाइल डाउनलोड करून घेण्याविषयीचा मेसेज दिसेल. त्याच्या खालील Click here to start download.. ला क्लिक करा. ही फाइल तुमच्या संगणकाच्या डेस्कटॉपवर सेव्ह होईल. त्यानंतर तुम्ही सेव्ह केलेली फाइल ओपन करा. त्यामधील EXT फाइल रन केल्यानंतर DaSh फाइल तुमच्या संगणकाच्या Start>Programs या ठिकाणी सेव्ह होईल. आता तुमचे जी-टॅक ओपन करा त्यामधील settings¸ मध्ये Appearance >Chat Theme> My Themeहा पर्याय दिसू लागेल. आता Star ->all programs ->dash my theme-> click change background या क्रमाने जा. या फाइलमधील गुगलने दिलेले चार फोटो तुम्हाला दिसतील. त्यातील कोणताही एक फोटो निवडा किंवा तुम्हाला जो फोटो तुमच्या जी- टॉक चॅट विंडो मागे हवा आहे, तो फोटो या फाइल मध्ये टाका. फोटोची निवड करु न ओके बटन दाबा. आता जी-टॅक ओपन करा व पुन्हा त्यातील Setting ¸ मध्ये Appearance> Chat Theme >My Themeक्रमाने जा. आणि ओके क्लिक करून साइन आऊट करु न पुन्हा साइन इन करा. आत्ता तुम्ही तुमच्या आवडत्या मित्रांबरोबर तुमच्या इंटरेस्टिंग चॅट विडोसह चॅट करा.

गुगलचे नवे ऑनलाइन न्यूज रीडर

गुगलने फास्ट फ्लिप या न्यूज रीडरमध्ये राजकारण, अर्थजगत, क्रिडा, विज्ञान-तंत्रज्ञान, मनोरंजन, आरोग्य, पर्यटन, अग्रलेख अशा विभागात वर्गीकरण केले आहे. बीबीसी, न्यूयॉर्क टाइम्स, वॉशिंग्टन पोस्ट, फॉरेन पॉलिसी, बिझनेस विक, न्यूजवीक, नॅशनल रिव्ह्यू ऑनलाइन या वृत्तपत्राबरोबरच अटलांटिक, बिझनेस वीक, कॉस्मोपॉलिटन, एले, मॅरी क्लेरी आदी मासिकांमधील लेख गुगलने फास्ट फ्लिपवर उपलब्ध करुन दिले आहेत.

माध्यमे ऑनलाइन झाली असली तरी या ऑनलाइन माध्यमामधील एखादा मजकूर शोधून काढण्यासाठी बराच वेळ सर्च करावे लागते. जगातील काही महत्वाच्या वृत्तपत्रामध्ये आपल्या विषयाशी संबंधीत लेख अथवा वृत्त वाचायचे असेल तर त्या वृत्तपत्राच्या इंटरनेट आवृत्तीवर जाऊन शोधण्याचे काम करावे लागते. जगातील अनेक ऑनलाइन वाचकांच्या या सर्च करण्याचा त्रास आणि वेळ वाचवण्याचे काम गुगलच्या फास्ट फ्लिपने केले आहे.

गुगलमार्फत एकापेक्षा एक अशी नवनवीन संपल्पनाची निर्मिती करणा-या गुगल लॅबने गुगल फास्ट फ्लिप हे ऑनलाइन न्यूज रीडर आणले आहे. या ऑनलाइन न्यूज रीडरच्या माध्यमातून वाचक जगातील दर्जेदार वृत्तपत्रांमधील लेख, वृत्त सहज आणि सोप्या पद्धतीने वाचू शकतात. फास्ट फ्लिपवर केवळ वृत्तपत्रे नव्हे तर जगातिल सर्वोत्तम मासिके वाचण्यास मिळणार आहेत. गुगलने या फास्ट फ्लिपमध्ये राजकारण, अर्थजगत, क्रिडा, विज्ञान-तंत्रज्ञान, मनोरंजन, आरोग्य, पर्यटन, अग्रलेख अशा विभागात वर्गीकरण केले आहे. बीबीसी, न्यूयॉर्क टाइम्स, वॉशिंग्टन पोस्ट, फॉरेन पॉलिसी, बिझनेस विक, न्यूजवीक, नॅशनल रिव्ह्यू ऑनलाइन या वृत्तपत्राबरोबरच अटलांटिक, बिझनेस वीक, कॉस्मोपॉलिटन, एले, मॅरी क्लेरी आदी मासिकांमधील लेख गुगलने फास्ट फ्लिपवर उपलब्ध करुन दिले आहेत. सध्या एकूण ३९ वृत्तपत्रे आणि मासिकांचा या न्यूज रीडरमध्ये समावेश आहे.

नेटविश्वातील नवनवीन शोधांबरोबरच यूझर फेंडली गोष्टींची निर्मिती करण्यात गुगल कायम पुढे आहे. फास्ट फ्लिप या न्यूज रीडरची मांडणी आणि अतिशय सुटसुटीत असल्यमुळे प्रत्यक्षात वृत्तपत्र वाचण्याचा अनुभव या न्यूज रीडरमधून मिळतो. विषयानुसार मांडणी केल्यामुळे वाचकांना हवी असणारी माहिती सहज उपलब्ध होते. सध्या तरी अमेरिकेतील वृत्तपत्रे आणि मासिके यांच्या फास्ट फ्लिपवर समावेश असला आहे. मात्र भविष्यात जगातिल अन्य देशातील वृत्तपत्रे आणि मासिकाचा यामध्ये समावेश होणार आहे.

गुगलच्या नव्या फास्ट फ्लिप जाण्यासाठी क्लिक करा- http://fastflip.googlelabs.com/